Dr. Otto Buurman (1890-1967) hett neet blot as Dokter allerbest wat leist, man he hett ok mit sien hooddüütsk-plattdüütsk Lexikon up de Grundlaag van de oostfreeske Mundart en heel belangriek Wark för de Pleeg van dat oostfreeske Platt achterlaten. Dat Woordenbook wurr van Jaques Groeneveld, Johann Schoon un Dr. Buurman as Herutgever erarbeidt. Dat wurr van 1962 bit 1975 in de Wachholtz Verlag in twalv Bannen rutgeven. 1993 hett de Vereen “Oostfreeske Taal” dat noch eenmaal neei upleggt.
In Tosamenarbeid mit de Landskuppsbibliothek wurr Diedrich Meyer in Februarmaant 2016 anstellt, umdat dat Woordenbook digitaliseert worden sull. So is “de Buurman” in en Online-Woordenbook umwannelt worden, dat nu för elk un een up de Webbstee van Oostfreeske Taal to Verfögen steiht. Dit neei Angebood passt wunnerbaar to dat hoogdüütsk-plattdüütsk Online-Woordenbook van de Oostfreeske Landskupp, dat dat al siet 2015 gifft.
