Projekten
De Vereen Oostfreeske Taal hett en Bült Projekten stöönt. Besünners to nömen sünd de Bedeligungen an de Woordenbokenprojekten van de Oostfreeske Landskupp, dat Oostfreeske Woordenbook (Plattdüütsk-Hoogdüütsk) van Jürgen Byl un Elke Brückmann, dat 1992 rutgeven worden is un dat Woordenbook (Hoogdüütsk-Plattdüütsk) van Gernot de Vries ut dat Jahr 2000.
In Tosamenarbeid mit de Landskuppsbibliothek wurr in Februarmaant 2016 Diedrich Meyer anstellt, umdat de Woordenboken van Otto Buurman digitaliseert worden sullen. So is „de Buurman“ in en Online-Woordenbook umwannelt worden, dat nu för elk un een up de Webbstee van Oostfreeske Taal to Verfögen steiht.
Van 2011 bit 2015 hett de Vereen sük an de Kösten för dat eerste oostfreeske Online-Woordenbook bedeligt. www.platt-wb.de
1992 wurr dat Projekt „Plattdüütsk bi d’ Arbeid” in Tosamenarbeid mit dat Plattdüütskbüro van de Oostfreeske Landskupp in dat Leven ropen. 2006 is daarut de „Plattdüütskmaant”, de de Vereen elke Jahr stöönt, entstahn.
En Bült Stöön hett dat för de Tiedschrift „Diesel – dat oostfreeske Bladdje” van 1992 – 2018 geven. Spietelk as dat is, is de Tiedschrift 2018 instellt worden. Upstünds worden de Leden dreemaal in ‘t Jahr mit dat PlattBladd, dat mit de Post kummt, over dat, wat dat Neeis in uns Vereen un in dat Plattdüütskbüro gifft, informeert.
De Vereen hett in de Jahren 2019 – 2023 de Spraaklern-App PlattinO A1 un de Nafolger A2 mit en Bült Deiten stöönt. Ok de leste Deel van de App, PlattinO B1, de in de Sömmer 2024 rutkomen sall, stöönt Oostfreeske Taal mit Deiten.
